Die Navetiste
 E ganz seltenes un
aussagekräftiges Bild hat es Andrea ins Internet
gstellt: der Bogaroscher Bahnhof mit eem Zug der
grad Halt macht un uf der rechtsi un linksi Seit vun
der Hauptgass, gehn die Fahrgäscht, die grad
ausgstie sin, ins Dorf nin. Des war frieher e ganz
alltägliches Bild, do driwwer han ich e kleeni
Gschicht gschrieb, die ich nochmol zum beschte gin
will:
In de letschte Johre hat mer in Bogarosch, wie in de
meischte Banater Derfer bestimmt auch, eigenartige
Sache beowachte kenne. Morjets und Oweds sind wahre
Prozessione vun Leit zu un vun der Bahnhstation
gepilgert. Es ware die Leit die Naveta gemacht han,
die "Navetiste", die in die umliegende Städt un uf
Temeschwar in die Fabrike uf die Arweit gfahr sin.
Bis in die 1970er Johre sin se zusätzlich mit em
Autobus gfahr, die Autobushaltestell war in
Bogarosch an der Kerch, is awer dann Ende der 1970
Johre abgschafft gin.
In de letschte Johre hat jedes Kind
bzw. Jugendliche mindeschtens 10 Johr in die Schul
gehn misse. Weil in Bogarosch nor 8 Klase ware sin
noch derzu die Schiler mitm Zug in die Schul gfohr,
uf Schadat, Hatzfeld oder Temeschwar. So is die
Pilgerei morjets zum und oweds vum Bahnhof
zustandkumm. Derbei is nit jeder zu Fuss an die Bahn
gang, vieli sin mitm Bizikl gfahr un han's dann bei
Leit die nächst an der Bahn gewohnt han unergstellt,
bei manchem han de Tach iwer an die 30-40 Bizikle im
Hof un im Schopp gstan.
Während der Fahrt mitm Zug hat mer
uf die een oder aner Art die Zeit tot gschlaa, die
eene han verzählt, die anre han geleest, awer
morjets, im Friehzug uf Temeschwar is 2 Stund
gschlof gin, so lang is mer bis in die Stadt gfahr.
E anri beliebti Beschäfti- gung während der Fahrt
war es Kartespiele, meischtens is gfuxt gin, im
Motor, wu Licht gebrennt hat, war des nit weiter
problematisch, mir jungi Hartschlechti sin awer
immer in der "Remorca" ingstie, wu mer nit uner
Ufsicht vun de Alte war, un dort war's dunkel, do
sin der rumänisch Bahn die Biere ausgang. Mir han
uns dann doder- mit beholf, dass mer e in eem Stick
Holz e Loch gebohret, ausse rum e glanziches Stick
Blech genagelt, in des Loch e Kerz ningstellt hat
und schun han mer Licht ghat zum Fuxe. In meiner
Kartepartie ware noch drei Grawatzer, sogar die 10
Minute vun Grawatz uf Hatzfeld hat mer zum Fuxe
genutzt.
Heit is der Bogaroscher Bahnhof
verwaist, es fahrt längscht ken Zug mehr, geblieb is
nor die Erinnerung an e Zeit die nit eenfach, awer
trotzdem manchmal scheen war.
Ewald Spang
|
|
